గీథ్ : పాడుదాం పాడుదాం భారతి జయ గీతం

Download

పాడుదాం పాడుదాం భారతి జయ గీతం

వాడిపోని వైభవాల పావన సంగీతం

వేద శారదాంబ వేలు శృతి చేసిన వల్లకీ

సకల విశ్వ శ్రేయమె స్వర సంచారము దీనికి

పరమ పదము పదమైనది ఈ పవిత్ర గీతికి

యోగరాగమీగానం ఆగదు ఏ యుగానికి

ప్రతి పురుగు ఈ పుడమిని పలుకును ఆ ప్రణవమే

ఈ దేశపు దేహం ప్రత్యణువు ఆ గానమే

తలలూచే తరులన్నీ విరబూచే విరులన్నీ

పడిలేచే అలలన్నీ పాడును ఆ గానమే

ఈ పొలాల పంట సిరుల తరగని శ్రీ రాగం

ఈ కోనల నాగుల బుస శంకరాభరణం

ఈ చందన శీతల పవనాలలోని హిందోళం

ఈ సుందర కాననాల కళ్యాణి గమనం

ప్రళయ ప్రభంజనమిచ్చట శివరంజని గా

ప్రతి ప్రభాత భూపాళం శుభ సూచనగా